शासकीय नियमानुसार काठ्या-पालख्यांना परवानगी: प्रांताधिकारी सुधाकर भोसले

दैनिक चालु वार्ता

पिंपळगाव :- रोठा ता.पारनेर येथील भाविकांचे श्रध्दास्थान व कुलदैवत असलेल्या कोरठण खंडोबा देवस्थानच्या दि.१७ते१९जानेवारी दरम्यान यात्रेनिमित्त मानाच्या काठ्या व पालख्यांना परंपरेनुसार देवदर्शन घेण्यासाठी काठ्या व पालख्यांसोबत असलेल्या मोजक्याच भाविकांना कोरोनाबाबतचे सर्व शासकीय नियम पाळून परवानगी मिळेल असे प्रांताधिकारी सुधाकर भोसले यांनी काठ्या-पालख्यांच्या मानक-यांच्या प्रशासन व देवस्थानच्या बैठकीत अध्यक्षपदावरून बोलताना स्पष्ट केले.
यावेळी तहसीलदार शिवकुमार आवळकंठे, देवस्थानचे अध्यक्ष अॅड.पांडुरंग गायकवाड, उपाध्यक्ष गंगाराम बेलकर, पोलिस निरीक्षक घनश्याम बळप, सरपंच सुरेखा वाळुंज, उपसरपंच महादेव पुंडे, विश्वस्त अमर गुंजाळ,चंद्रभान ठुबे, किसन मुंढे,बन्शी ढोमे, देविदास क्षिरसागर, दिलिप घोडके, रामदास मुळे, तंटामुक्ती अध्यक्ष गोपीनाथ घुले, अच्युतराव जगदाळे, डॉ.प्रतीक शिंदे, डॉ.नवनाथ शेलार, मंडलाधिकारी पंकज जगदाळे, मानकरी सुरेश गायकर, शांताराम गाडगे, साहेबराव वाफारे, सुरेश शिंदे, एकनाथ गाडगे, राजेंद्र मटाले, निवृत्ती भुजबळ, आदी उपस्थित होते.
प्रांताधिकारी साहेबांनी यावेळी सांगितले की मानाच्या काठ्या, पालखी सोबतच्या भाविकांचे ४८तासापुर्वीची आर.टी.पी.सी. आर.चाचणी तसेच लसीकरणाचे दोन्ही डोस घेतलेले बंधनकारक राहणार असून कोरोनाबाबत सर्व प्रकारची काळजी घेऊन परंपरेप्रमाणे कमीत कमी लोकांमध्ये यात्रेचे धार्मिक कार्यक्रम केले जातील.मागील वर्षीप्रमाणेच मानाच्या काठ्यांची उंची तेवढीच राहणार असल्याचे भोसले यांनी स्पष्ट केले.देवस्थान जवळ कोणतीही मानाची काठी व पालखी मुक्कामी राहणार नाही असे त्यांनी सांगितले.
घनश्याम बळप यांनी एका काठी-पालखीसोबत प्रत्येकी १०भाविकांना परवानगी मिळणार असून त्यासंबंधी आवश्यक कागदपत्रे पारनेर पोलिस ठाण्यात सादर केल्यानंतर त्यांना पास‌ दिले जातील.देवस्थानचे विश्वस्त, कर्मचारी, सुरक्षा यंत्रणा यांनाही नियमानुसार कागदपत्रे सादर केल्यानंतर काठ्या-पालखीच्या वाहनांना पास दिला जाईल.
बिगर पासचे कोणतेही वाहन अथवा भाविकाला देवस्थान जवळ सोडले जाणार नाही असे बळप यांनी स्पष्ट केले.दि.१४व१५जानेवारी रोजी पारनेर पोलिस ठाण्यात या संबंधीची प्रक्रिया पूर्ण करण्यात येईल असे सांगितले. यात्रा काळात भाविकांसाठी दर्शन व्यवस्था बंद राहील असे प्रशासन व देवस्थान कडून स्पष्ट करण्यात आले.