ओमिक्रॉनच्या नवीन व्हेरियंटनं टेन्शन वाढवलं, पुण्यात चार लहान मुलांचे नमुने

दैनिक चालु वार्ता

पुणे :- मुंबई आणि पुण्यासह महाराष्ट्रात ओमिक्रॉनबाधितांचा धोका वाढत असतानाच, ओमिक्रॉन च्या नवीन व्हेरियंटने टेन्शन वाढवलं आहे. पुण्याच्या नॅशनल इन्स्टिट्युट ऑफ व्हायरॉलॉजी मध्ये जीनोम सिक्वेन्सिंग केलेल्या लहान मुलांमध्ये ओमिक्रॉनचा बीए २ सब व्हेरियंट आढळून आला आहे. सहा वर्षांपेक्षा कमी वयोगटाच्या चार मुलांचे नमुने जीनोम सिक्वेन्सिंगसाठी एनआयव्ही पुणे येथे पाठवण्यात आले होते. मुलांचे नमुने पुण्याचे बालरोग विशेषज्ज्ञ डॉ. नीलेश गुजर यांच्याकडून पाठवण्यात आले होते. त्यात ओमिक्रॉनचा नवीन व्हेरियंट आढळून आला.
करोनाच्या तिसऱ्या लाटेत लहान मुले बाधित होण्याचे प्रमाण अधिक असेल, अशी शक्यता अनेक तज्ज्ञांनी खूप आधी व्यक्त केली होती. या लाटेत मोठ्या संख्येने मुले बाधित होत असल्याचे आकडेवारीवरून सध्या तरी दिसून येत आहे. याबाबत एका वृत्तसंकेतस्थळाला माहिती देताना, डॉ. निलेश गुजरर यांनी सांगितले की, ‘माझ्या क्लिनिकमध्ये काही रुग्ण आले होते. त्यातील काही जण करोनाबाधित असल्याचे आढळून आले होते. त्यानंतर एनआयव्ही पुणे येथे काही जणांचे नमुने जीनोम सिक्वेन्सिंगसाठी पाठवण्यात आले होते. या चार मुलांच्या नमुन्यांमध्ये ओमिक्रॉनचा नवीन व्हेरियंट बीए २ आढळून आला आहे. सध्या यावर अभ्यास सुरू आहे.’
ओमिक्रॉनच्या दोन्ही व्हेरियंटची लक्षणे सारखीच ओमिक्रॉनचा नवीन व्हेरियंट किती घातक आहे, याची सविस्तर माहिती घेतली जात आहे. डॉ. निलेश गुजर यांच्या म्हणण्यानुसार, ओमिक्रॉन बीए १ आणि बीए २ व्हेरियंटमध्ये अनेक लक्षणे एकसारखीच आहेत, असे दिसून आले आहे. या दोन्ही व्हेरियंटच्या संसर्गामुळे घसा खवखवणे किंवा दुखणे, डोळे दुखणे किंवा जळजळ होणे, लहान मुलांचे हातपाय दुखणे आदी लक्षणे आढळून आली आहेत.