भोसरी ते किल्ले शिवनेरी प्रवसासाठी पीएमपीएमएल बससेवा शुक्रवार पासून सुरु!

दैनिक चालु वार्ता, वृत्तसेवा

जुन्नर/ पुणे : -पुणे, पिंपरी चिंचवड शहरासह राज्यातून आणि देशभरातून मोठ्या प्रमाणावर पर्यटक हे शिवजन्मभूमी किल्ले शिवनेरी, जुन्नर, नारायणगाव, ओझर, लेण्याद्री येथे येत असतात. नारायणगाव, जुन्नर परिसरातील नागरिक व कामगार विद्यार्थी हे देखील पुणे पिंपरी चिंचवडला जाण्यासाठी खासगी वाहनाने प्रवास करत आहेत. जुन्नर तालुक्‍यातील किल्ले शिवनेरीवर देशभरातून येणाऱ्या पर्यटकांसाठी भोसरी ते किल्ले शिवनेरी प्रवसासाठी पुणे महानगर परिवहन महामंडळ (पीएमपीएमएल) बससेवा शुक्रवार (दि. 10) पासून धावणार असल्याने शिवभक्‍तांना शिवजयंतीच्या अगोदर गिफ्ट मिळाले आहे.
तालुक्‍यात पर्यटनाच्या निमित्ताने येणाऱ्या पर्यटक नागरिकांची व भाविकांची गैरसोय लक्षात घेता भोसरी ते जुन्नर मार्गावर पीएमपीएमएलची बससेवा सुरु करण्यात यावी अशी मागणी आमदार बेनके यांनी 25 ऑक्‍टोबर 2021 रोजी पीएमपीएमएलचे व्यवस्थापकीय संचालक लक्ष्मी नारायण मिश्रा यांना पत्र लिहून केली होती. त्यानंतर पीएमपीएमएल प्रशासनाने भोसरी ते किल्ले शिवनेरी जुन्नर या मार्गाचा सर्व्हे केला.
या संदर्भात आमदार बेनके यांनी जिल्हाधिकारी डॉ. राजेश देशमुख यांचीही भेट घेतली होती. दरम्यान, आमदार महेश लांडगे, जिल्हा परिषदेच्या सदस्या आशा बुचके यांनीही पीएमपीएमएलच्या वरिष्ठ अधिकाऱ्यांशी देखील चर्चा केली होती. या मागणीची दखल घेत प्रशासनाने सकारात्मक प्रतिसाद देत शुक्रवारपासून बससेवेचा शुभारंभ करण्यात येणार आहे.