कर्नाटकातील शिमोगामध्ये घडलेल्या हत्याकांडाची देशभर चर्चा!

दैनिक चालु वार्ता, वृत्तसेवा

बंगळूर :- हिजाबचा वाद शांत होत असताना कर्नाटकातील शिमोगात बजरंग दलाच्या कार्यकर्त्याच्यामुळे हिसेंची ठिणगी पडली आहे. कर्नाटकातील शिमोगामध्ये घडलेल्या या हत्याकांडाची देशभर चर्चा सुरू असून, शहरात या घटनेचे तीव्र पडसाद उमटताना दिसत आहेत. घटनेनंतर काही ठिकाणी जाळपोळ आणि दगडफेकीच्या घटना घडल्या. दरम्यान, शहरातील सिद्दैया रोड परिसरात जमावाला पांगवण्यासाठी पोलिसांनी हवेत गोळीबार केला. परिस्थिती तणावपूर्ण असल्याने शहरातील शाळा-महाविद्यालयांना दोन दिवसांची सुट्टी देण्यात आली आहे.
हिजाब वाद चिघळल्यानं कर्नाटकातील शिमोगामध्ये तणावपूर्ण परिस्थिती निर्माण झाली होती. परिस्थिती सुरळीत होत असतानाच रविवारी रात्री बजरंग दलात कार्यरत असलेल्या हर्षा नावाच्या २६ वर्षीय तरुणाची निघृर्ण हत्या करण्यात आल्याची घटना घडली. रविवारी (२० फेब्रुवारी) रात्री ही घटना घडली. शहरातील भारती कॉलनीमध्ये काही अज्ञात लोकांनी बजरंग दलाचा कार्यकर्ता असलेल्या हर्षावर चाकू हल्ला केला. हल्ला करणाऱ्यांमध्ये चार ते पाच तरुणांचा समावेश असावा, कर्नाटकच्या गृहमंत्र्यांनी म्हटलं आहे.
हर्षा हत्या प्रकरणात पोलिसांनी दिवसभरात तीन आरोपींना अटक केली आहे. पोलिसांकडून आरोपींची धरपकड सुरू असतानाच या प्रकरणाचा तपास एनआयएकडे देण्याची मागणी आज करण्यात आली आहे. केंद्रीय मंत्री शोभा करंदलाजे यांनी कर्नाटकाचे मुख्यमंत्री बसवराज बोम्मई यांना पत्र लिहिलं आहे.