
दैनिक चालु वार्ता, वृत्तसेवा
किरीट सोमय्या म्हणाले अनिल परब यांच्यानंतर पुढचा नंबर हसन मुश्रीफांचा
मुंबई :- भाजप नेते किरीट सोमय्या यांनी महाविकास आघाडी सरकारच्या अनेक नेत्यांवर गंभीर आरोप केले आहेत. नवाब मलिक, संजय राऊत, हसन मुश्रीफ, अनिल परब अशा अनेक नेत्यांवर सोमय्यांनी आरोप केले आहेत. त्यातच आज ते अनिल परब यांच्या साई रिसॉर्टवर हातोडा चालवण्यासाठी दापोलीकडे निघाले आहेत. यावेळी सोमय्यांनी सांगितलं की, अनिल परब यांच्यानंतर पुढचा नंबर हसन मुश्रीफांचा आहे. ठाकरे सरकारचे ग्रामविकास मंत्री हसन मुश्रीफ यांनी आपल्या जावयाच्या जयोस्तूते मॅनेजमेंट प्रा. लि. कंपनीला १५०० कोटी रुपयांचे कंत्राट दिल्याप्रकरणी सोमय्या यांनी गंभीर आरोप केले होते.
महाराष्ट्रातील २७००० ग्राम पंचायतीचे TDS रिटर्न पुढच्या १० वर्षांपर्यंत जयोस्तूते मॅनेजमेंट प्रा. लि. कंपनी फाइल करणार आणि त्यासाठी प्रत्येक ग्रामपंचायतीला दरवर्षी जवळपास ५०,००० रुपये द्यावे लागणार होते. भाजपा नेते किरीट सोमय्या यांनी यासंबंधी तक्रार दाखल केली होती. तसेच त्यांनी माध्यमांसमोर हा विषय आणला होता. मुश्रीफ यांनी अपारदर्शकपणे १० मार्च २०२१ रोजी हे १० वर्षांचे कंत्राट दिल्याचे पुरावे सोमय्यांनी दिले होते. सप्टेंबर महिन्यात त्यांनी माहिती उघडकीस आणाली होती.
जयोस्तूते मॅनेजमेंट प्रा. लि. कंपनीची स्थापना २०१२-१३ मध्ये झाली. परंतु हसन मुश्रीफ यांचे जावई मतीन यांनी ही कंपनी ८ महिन्यांपूर्वीच विकत घेतली. मागील ८ वर्षात या कंपनीला काहीच आवक नाही. तसेच सन २०१९-२० मध्येही कंपनीची उलाढाल शून्य होती. यानंतरही संबंधित कंपनीला कंत्राट दिल्याने सोमय्या यांनी घोटाळा झाल्याचा आरोप केला.