बारामती तालुक्यातील सुपे येथील श्री मयुरेश्वर ग्रामीण बिगरशेती सहकारी पतसंस्थेच्या नूतन वास्तूचे उद्घाटन!

दैनिक चालु वार्ता

पुणे :- बारामती तालुक्यातील सुपे येथील श्री मयुरेश्वर ग्रामीण बिगरशेती सहकारी पतसंस्थेच्या नूतन वास्तूचे उद्घाटनआणि ४ कोटी ९० लाख रुपयांच्या विविध विकासकामांचे भूमिपूजनाचे कार्यक्रम पार पडले. सुपे परिसरातील कृषि उत्पन्न बाजार समितीची इमारत, ग्रामीण रुग्णालय इमारत, सुपे ग्रामीण पोलीस स्टेशन, मयुरेश्वर अभयारण्य, विद्या प्रतिष्ठान संकुल इत्यादी ठिकाणी चाललेल्या कामांची पाहणी करून संबंधित अधिकाऱ्यांना कामं वेळेत आणि दर्जेदार करण्याच्या सूचना दिल्या.
श्री मयुरेश्वर पतसंस्थेच्या माध्यमातून सुपे येथील व्यापारी, शेतकरी, महिला व लघु उद्योजक यांना चांगला आर्थिक स्त्रोत उपलब्ध झाला आहे. पतसंस्थेनं सहकार्याची भूमिका घेऊन लोकांना मदत करावी. संस्था चांगल्या चालल्या पाहिजेत. विश्वासानं ठेवलेल्या ठेवी सुरक्षित राहिल्या पाहिजेत. संस्थेत सामाजिक बांधिलकीची जाणीव ठेवून सर्वांनी काम करावं. संस्थेच्या माध्यमातून गोरगरीब बांधवांना मदत कशी मिळेल याकडे संस्थेच्या संचालक मंडळानं लक्ष द्यावं. सुपे परगण्यात मोठ्या प्रमाणात विकासकामं करण्यात येत आहेत.
सुपे येथे पशुवैद्यकीय दवाखान्याच्या श्रेणीत वाढ करण्याबाबत प्रस्ताव ग्रामपंचायतीनं सादर करावा. सुपे गावात १०० एकर जागेत महिला पोलिसांसाठी सुविधा आणि चांगलं शैक्षणिक संकुल उभं करायचं आहे. मुलांचं- मुलींचं वसतिगृह, शिवसृष्टी इत्यादी अनेक कामं करावयाची आहेत. याबाबत संबंधित पदाधिकारी – अधिकारी यांनी प्रस्ताव सादर करावेत. उन्हाळ्यात विजेची मागणी वाढत आहे. विजेची टंचाई निर्माण होऊ नये म्हणून बाहेरच्या कंपन्यांकडून वीज खरेदी करण्यात येणार आहे.
नागरिकांनी वीज बिल व घर पट्टी वेळेत भरली पाहिजे तरंच चांगल्या प्रकारच्या सुविधा उपलब्ध होतील. ऊस उत्पादक शेतकऱ्यांनी पाण्याचं नियोजन करूनच ऊसाचं उत्पादन घ्यावं. सर्व शेतकऱ्यांचा ऊस गाळप होईपर्यंत कारखाने चालूच राहतील, याबाबत संबंधितांना आदेश देण्यात आले आहेत.