दैनिक चालु वार्ता वृत्तसेवा-
पुणे, दि.30: एकात्मिक आदिवासी विकास प्रकल्प घोडेगाव अधिनस्त असलेल्या पुणे, कोल्हापूर, सातारा व सांगली जिल्ह्यातील अनुसूचित जमातीच्या विद्यार्थ्यांना 2022-23 या शैक्षणिक वर्षात परदेशी शिष्यवृत्ती योजने अंतर्गत लाभ मिळण्याकरीता 8 जुलै पर्यंत विहित नमुन्यातील अर्ज करण्याचे आवाहन करण्यात आले आहे.
विद्यार्थ्यांनी एम.बी.ए. वैद्यकीय, बी.टेक, विज्ञान, कृषी व अभ्यासक्रमातील पदवी व पदव्युत्तर व इतर विषयांचे अभ्यासक्रमाकरिता अर्ज करावेत. विद्यार्थ्यांच्या पालकांचे कौटुंबिक वार्षिक उत्पन्न कमाल मर्यादा रुपये 6 लाखापर्यंत असावी. विहित नमुन्यातील अर्ज एकात्मिक आदिवासी विकास प्रकल्प कार्यालय, घोडेगाव येथे विनामूल्य उपलब्ध करुन देण्यात आले आहेत. या योजनेचा लाभ घेण्यासाठी एकात्मिक आदिवासी विकास प्रकल्प घोडेगाव, ता. आंबेगाव जि.पुणे या कार्यालयाशी संपर्क साधण्याचे आवाहन एकात्मिक आदिवासी विकास प्रकल्पाचे प्रकल्प अधिकारी बळवंत गायकवाड यांनी केले आहे.