दैनिक चालू वार्ता वृत्तसेवा-
नवी दिल्ली : फीफा वर्ल्ड कप 2022 मध्ये मंगळवारी एका धक्कादायक निकालाची नोंद झाली. लिओनेल मेस्सीच्या बलाढ्य अर्जेंटिनाला पराभवाचा धक्का सहन करावा लागला.
तो सुद्धा तुलनेने दुबळ्या समजल्या गेलेल्या सौदी अरेबियाकडून. ग्रुप सी च्या मॅचमध्ये सौदी अरेबियाने अर्जेंटिनाला 2-1 ने हरवलं. लिओनेल मेस्सी हा जगप्रसिद्ध फुटबॉलपटू आहे. त्याच्या खात्यात अजून एकही वर्ल्ड कप नाहीय.
यंदा जेतेपदाचा दुष्काळ संपवण्याच्या इराद्याने मेस्सी आणि अर्जेंटिनाची टीम मैदानात उतरली होती. पण कतारमध्ये सुरु असलेल्या फुटबॉल वर्ल्ड कपमध्ये अर्जेंटिनासाठी खूपच निराशाजनक सुरुवात झालीय. यंदाच्या फुटबॉल वर्ल्ड कपमधला हा पहिला धक्कादायक निकाल आहे.
मेस्सीने 10 व्या मिनिटालाच गोल करुन अर्जेंटिनाला आघाडी मिळवून दिली होती. पण दुसऱ्या हाफमध्ये सौदी अरेबियाने शानदार खेळ दाखवला. अर्जेंटिनाची बचाव फळी भेदून सौदी अरेबियाने दोन गोल केले. अर्जेंटिनाने सामन्यात पुनरागमन करण्यासाठी जोरदार प्रयत्न केले. पण त्यांना सौदी अरेबियाचा बचाव भेदून गोल झळकावता आला नाही.
मागच्या 36 मॅचपासून अर्जेटिंनाची टीम अपराजित होती. तो विजयी क्रम सौदी अरेबियाने बिघडवला. अर्जेंटिनाची टीम 2019 नंतर पहिल्यांदा पराभूत झाली.
अर्जेंटिनाची टीम सौदी अरेबियावर भारी पडणार असं दिसत होतं. दुसऱ्याच मिनिटाला मेस्सीने गोल करण्याचा शानदार प्रयत्न केला होता. सहाव्या मिनिटाला सुद्धा मेस्सीने प्रयत्न केला. पण ओवेसने गोल होऊ दिला नाही. 10 व्या मिनिटाला सौदी अरेबियाच्या अल बुलायाहीने अर्जेंटिनाच्या बॉक्समध्ये फाऊल केला. रेफ्रीने अर्जेंटिनाला पेनल्टी कीक बहाल केली. मेस्सीने या पेनल्टीवर गोल करुन टीमला 1-0 अशी आघाडी मिळवून दिली. त्यानंतर पहिल्या हाफमध्ये कुठलाही गोल झाला नाही. अर्जेंटिनाची टीम 1-0 ने पुढे होती.
दुसऱ्या हाफमध्ये सौदी अरेबियाची टीम बरोबरी साधण्याचा प्रयत्न करत होती. त्यात ते 48 व्या मिनिटाला यशस्वी ठरले. अल सेहरीने सौदीसाठी गोल केला. फेरास अल ब्रिकानने गोल करण्यासाठी मदत केली. फेरासने सेहरीकडे पास दिला. त्याने गोल मारुन बरोबरी साधून दिली.
55 व्या मिनिटाला सौदी अरेबियाने दुसरा गोल करुन आघाडी मिळवली. सलेम अल दवसरीने गोल केला. सलीमने आपल्या राइट फुटने चेंडू कट केला व शानदार किक मारुन दुसरा गोल केला. त्यानंतर सौदीने शेवटपर्यंत आघाडी टिकवत एका ऐतिहासिक विजयाची नोंद केली.