💥 रस्ता दुरुस्तीसाठी समृद्धी महामार्गावर चक्काजाम आंदोलन करणार..! 💥 ⭐ राष्ट्रवादी युवक काँग्रेसचे प्रदेश सरचिटणीस प्रा. प्रशांत पाटील गोळे यांचा इशारा. 

दैनिक चालु वार्ता वाशीम प्रतीनीधी –  वसंत खडसे 

वाशिम : जिल्ह्यातून गेलेल्या समृध्दी महामार्गाच्या बांधकामासाठी लागणारे साहित्य वाहून नेणाऱ्या अवजड वाहना मुळे रिसोड तालुक्यातील केनवड नजीकच्या बेलगाव, भौरद, सावळद आदी गावांना जोडणाऱ्या मुख्य ग्रामीण रस्त्यांची अक्षरशः चाळण झाली आहे. सदर वापरलेल्या रस्त्यांना दुरुस्त करून ते पूर्ववत करण्याची जबाबदारी ठेकेदार म्हणून नेमण्यात आलेल्या आपको कंपनीची असल्या कारणाने आपण कंपनीचे सरव्यवस्थापक यांना अनेक वेळा लेखी स्वरूपात विनंती केली असता कंपनीच्या व्यवस्थापनाने त्वरीत रस्ता दुरुस्त करून देण्याचे आश्वासन दिले होते. मात्र, तीन चार महिन्यांचा कालावधी उलटून सुद्धा सदर कंपनीने रस्ता दुरुस्तीसाठी कुठलीही हालचाल केली नाही. तथापि या बाबत आपण पुन्हा पाठपुरावा करण्याच्या उद्देशाने कंपनीच्या व्यवस्थापनाशी संपर्क साधला असता कंपनी कडून अर्वाच्य भाषेचा अवलंब करण्यात आला आहे.याबाबत प्रसार माध्यमांच्या प्रतिनिधींनी जाब विचारला असता सदर कंपनी कडून अरेरावीच्या भाषेत उडवा उडवीची उत्तरे मिळाली सल्याचा आरोप राष्ट्रवादी युवक काँग्रेसचे प्रदेश सरचिटणीस प्रा. प्रशांत गोळे यांनी केला असून ,सबंधित कंपनीने दिलेल्या खोट्या आश्वासनाच्या विरोधात व त्वरीत रस्ता दुरुस्त करण्याच्या मागणी साठी राष्ट्रवादी युवक काँग्रेसच्या वतीने समृध्दी महामार्गावर चक्काजाम आंदोलन करणार असल्याचा इशारा प्रा. प्रशांत पाटील गोळे यांनी दिलेल्या प्रसिध्दी पत्रकातून दिला आहे.

समृध्दी महामार्गाच्या बांधकामासाठी लागणारे साहित्य वाहून नेण्यासाठी केनवड परिसरातील बेलगाव, भौरद, सावळद आदी गावांना जोडणाऱ्या मुख्य रस्त्यांचा सर्रास वापर केल्यामुळे अवजड वाहनांनी रस्ता उखडून टाकला आहे, परिणामी आसपासच्या गावातील ग्रामस्थांना मुख्य बाजारपेठ असलेल्या केनवड व कार्यालयीन विविध कामांच्या अनुषंगाने तालुक्याच्या ठिकाणी जाणे दुरापास्त होऊन बसले आहे. त्यामुळे परिसरातील नागरीक वैतागले आहेत.त्यांची गैरसोय दूर व्हावी म्हणून राष्ट्रवादी युवक काँग्रेसने पुढाकार घेऊन अनेक वेळा सबंधित कंपनीशी संपर्क साधला होता परंतु सदर कंपनीने प्रत्येक वेळी खोट्या आश्वासनाची खैरात वाटण्या पलीकडे रस्ता दुरुस्तीसाठी कुठलीही हालचाल केली नाही. परिणामी परिसरातील नागरीक संतप्त झाले असून सबंधित ठेकेदार कंपनी प्रशासनाच्या विरोधात व त्वरित रस्ता दुरुस्त करून देण्याच्या मागणीसाठी येथून नजीकच असलेल्या समृध्दी महामार्गावर राष्ट्रवादी युवक काँग्रेस व संतप्त नागरीक यांच्या वतीने चक्काजाम आंदोलन छेडणार असल्याचा इशारा राष्ट्रवादी युवक काँग्रेसचे प्रदेश सरचिटणीस प्रा. प्रशांत पाटील गोळे यांनी दिलेल्या प्रसिध्दी पत्रकातून दिला आहे.