वाघनखे आणि जगदंबा तलवार महाराष्ट्रात परत मिळविण्यासाठी !!!! लंडनस्थित मराठी उद्योजकांची मंत्री सुधीर मुनगंटीवार यांच्यासोबत झाली चर्चा.

दैनिक चालु वार्ता चंद्रपूर जिल्हा उपसंपादक- दीपक कटकोजवार 

मुंबई, दि. १० मे २०२३

छत्रपती शिवाजी महाराजांची वाघनखे आणि जगदंबा तलवार ब्रिटनमधून भारतात परत आणण्यासाठी महाराष्ट्र शासनाचे सांस्कृतिक कार्यमंत्री श्री. सुधीर मुनगंटीवार यांनी सुरू केलेल्या प्रयत्नांना लागेल ती सर्व मदत करण्याचा निर्णय लंडनस्थित मराठी उद्योजकांनी घेतला आहे. काल मंगळवारी भारतीय प्रमाणवेळेनुसार रात्री दहा वाजता ना.सुधीर मुनगंटीवार यांनी आंतरजालीय दूरदृष्य प्रणालीद्वारे लंडनस्थित मराठी उद्योजकांशी संवाद साधला, तेव्हा या मराठी उद्योजकांनी हा प्रतिसाद दिला.

ना.श्री.सुधीर मुनगंटीवार यांनी लंडनस्थित मराठी उद्योजकांच्या ‘ओव्हरसीज महाराष्ट्रीयन प्रोफेशनल्स ऍन्ड आंत्रप्रेन्युअर्स ग्रुप – यूके’ (ओमपेग-युके) या संघटनेच्या पदाधिकारी आणि सभासदांसोबत आंतरजालीय दूरदृष्य प्रणालीद्वारे ही बैठक आयोजित केली होती. या संघटनेचे पदाधिकारी सर्वश्री रवींद्र गाडगीळ, आशुतोष देशपांडे, अभिजीत देशपांडे आणि जय तहसिलदार यांच्या पुढाकाराने ही बैठक यशस्वी झाली. यावेळी ना.श्री. सुधीर मुनगंटीवार यांनी विविध प्रश्नांनाही मनमोकळी उत्तरे दिली. लंडनस्थित मराठी उद्योजकांनी महाराष्ट्राच्या वन खात्याच्या, सांस्कृतिक कार्य खात्याच्या आणि मत्स्यव्यवसाय खात्याच्या विविध कार्यक्रम आणि योजनांमधेही सक्रीय सहभागी व्हावे असे आवाहनही त्यांनी यावेळी केले. ना.श्री. सुधीर मुनगंटीवार यांनी यावेळी राजे छत्रपती शिवाजी महाराजांची जगदंब तलवार आणि वाघनखे यांचे ऐतिहासिक महत्व, छत्रपती शिवाजी महाराजांचे भारतीय इतिहासातील महत्व, शिवराज्याभिषेकाचा यंदा होणारा त्रिशतकीय सुवर्णमहोत्सव, त्यानिमित्ताने राज्यभर आयोजित करण्यात येत असलेले विविध कार्यक्रम यांची माहिती आपल्या वक्तव्याद्वारे दिली. ब्रिटन देशाच्या भारतातील उप उच्चायुक्तां बरोबर जगदंब तलवार व वाघनखे भारतात परत आणण्या विषयी झालेल्या प्राथमिक चर्चेबाबत माहिती देवुन ब्रिटनमधील भारतीय आणि विशेषतः मराठी भाषिक लोकांनी ब्रिटिश सरकारला मोठ्या प्रमाणात पत्रे लिहून जगदंब तलवार आणि वाघनखे भारताला परत देण्याची मागणी करावी असे आवाहन मराठी बांधवांना महाराष्ट्राचे वने ,मत्स्यव्यवसाय व सांस्कृतिक कार्य मंत्री ना.श्री. सुधीर मुनगंटीवार यांनी केले. त्याप्रमाणे ब्रिटिश सरकारला मोठ्या प्रमाणात पत्रे लिहिण्याचा निर्णय आणि त्याकामी ब्रिटनस्थित सर्व भारतीयांचा सहभाग घेण्याचाही यावेळी ओमपेग युके च्या पदाधिकाऱ्यानी निर्णय घेतला आहे. त्याचबरोबर विविध ब्रिटिश उच्चपदस्थ अधिकारी आणि ब्रिटिश सरकारमधील उच्चपदस्थ राजकारणी यांच्या भेटी घेऊन छत्रपती शिवाजी महाराजांची जगदंब तलवार आणि वाघनखे भारताला परत करण्याची मागणी करण्याचाही निर्णय या संघटनेने घेतला आहे.

ना.श्री सुुधीर मुनगंटीवार हे जगदंबा तलवार आणि वाघनखे भारतीत आणण्यासंदर्भात ब्रिटिश सरकारशी बोलणी करण्याकरता जेव्हा लंडनला जातील, तेव्हा त्यांना पूर्ण सहकार्य करण्याचे आणि या ऐतिहासिक कार्यात आवश्यक तो सर्व सहभाग देण्याचे लंडनस्थित मराठी उद्योजकांनी दूरदृष्य प्रणाली बैठकीतून आश्वासन दिले आहे. याबद्दल ना. श्री सुधीर मुनगंटीवार यांनी आनंद व्यक्त करीत लंडनस्थित मराठी उद्योजकांनी ब्रिटनमधील इतर व्यवसायातील मराठी सोबतच अन्य भारतीय व्यावसायिक व नोकरदार मंडळींना याकामी सोबत घ्यावे असे आवाहनही नामदार. श्री मुनगंटीवार यांनी केले आहे. त्याला लंडनस्थित मराठी उद्योजकांनी मोठ्या स्वरूपात सकारात्मक प्रतिसाद दिलेला आहे.