नवरीचा प्रियकरच निघाला हल्लेखोर; शीघ्रगतीने तपास . !!! दोघे ताब्यात, चार फरार.

दैनिक चालु वार्ता उपसंपादक परभणी-  दत्तात्रय वामनराव कराळे 

परभणी : परभणी- वसमत राष्ट्रीय महामार्गावरील राहटी पूलावर भारतीय इस्त्रोच्या वैज्ञानिकावर झालेल्या हल्ला प्रकरणातील हल्लेखोरांना पोलिसांनी शीघ्र गतीने तपास करीत दोघांना ताब्यात घेतले असून त्यात नवरी मुलीचा प्रियकर व त्याच्या मित्रांचा या हल्ल्यात समावेश असल्याचे निष्पन्न झाले आहे.

दरम्यान, नवरीमुलीसह तिच्या प्रियकराला पोलिसांनी ताब्यात घेतले असून अन्य चौघे फरार त्यांचाही शोध घेतला जात आहे.

स्वत:च्या लग्नासाठी परभणीत येत असलेल्या व इस्त्रोत वरीष्ठ वैज्ञानिक असलेल्या पंकज प्रकाश कदम यांच्यावर सोमवार दि. ८ मे रोजी दुपारी ४.३० वाजताच्या सुमारास जीवघेणा हल्ला झाल्याची घटना घडली. या हल्ल्यात गंभीर जखमी झालेल्या कदम यांच्यावर उपचार सुरू आहेत. इस्त्रोमध्ये वरिष्ठ वैज्ञानिक असलेले पंकज कदम मुळचे यवतमाळ जिल्ह्यातील उमरखेड तालुक्यातील मुळावा येथील रहिवाशी आहेत. त्यांचा विवाह परभणी येथील वसमत रोडवरील शिवराम नगरातील मुलीसोबत ठरला होता. दि.९ मे रोजी दुपारी १२.३० वाजता परभणीतील वरद गार्डन मंगल कार्यालयात हा विवाह सोहळा होणार होता. या लग्नासाठी पंकज कदम आपल्या परिवारासह ८ मे रोजी येत होते. दुपारी ४.३० च्या सुमारास त्यांचे वाहन राहटी नदीवरील पूलावर आले असताना तीन मोटारसायकलवर आलेल्या सहा जणांनी नवरदेव पंकज यांचे वाहन थांबवले व नंतर त्यांच्यावर जीवघेणा हल्ला केला. मदतीसाठी येणार्‍यांनाही हल्लेखोरांनी धमक्या दिल्या. त्यानंतर हल्लेखोर तेथून पळून गेले. जखमी पंकज कदम यांचे हात, पाय व पाठीवर गंभीर दुखापत झाली असून सध्या त्यांच्यावर उपचार सुरू आहेत. हल्ल्याची माहिती मिळाल्यानंतर तहसीलदार गणेश चव्हाण, अप्पर पोलीस अधीक्षक यशवंत काळे, उपविभागीय पोलीस अधिकारी राजेंद्र शिरतोडे आणि स्थानिक गुन्हे शाखेच्या पथकाने भेट देवून चौकशी केली होती.

दरम्यान पंकज यांच्यावर चार ते पाच दिवसांपूर्वी नांदेड रेल्वे स्टेशन जवळ हल्ला झाला होता. त्यानंतर परभणी येथे स्वतःच्या लग्नासाठी येत असताना त्यांच्यावर दुसर्‍यांदा हा हल्ला करण्यात आला, त्यामुळे हल्लेखोरांचे टार्गेट पंकज कदम असल्याचे लक्षात आले. दरम्यान, या हल्ल्याच्या प्रकरणातील हल्लेखोरांना पकडण्याकरीता परभणी, पूर्णा व स्थानिक गुन्हे अन्वेषण विभागाने जोरदार तपास मोहीम सुरु केली होती.