दैनिक चालु वार्ता वृत्तसेवा-
=====================
कोरोना काळ वगळता इतिहासात पहिल्यांदाच शिवसेनेचा दसरा मेळावा दादरमधील शिवाजी पार्कऐवजी दुसऱ्याच ठिकाणी होण्याची शक्यता बळावली आहे.
=========================
शिवसेनेशी सलग्नित भारतीय कामगार सेनेनं शिवसेना मेळावा बीकेसी जवळील एमएमआरडीए मैदानात घेण्याची परवानगी मागितली आहे.
शिवसेनेत झाली फूट आणि आपणच खरी शिवसेना असल्याचा शिंदे गटाकडून केला जाणारा दावा यामुळे राजकीय वातावरण ढवळून निघालं आहे. त्यातच विजयादशमी जवळ येत असून, त्यानिमित्ताने होणारा शिवसेनेचा दसरा मेळावा कुठे होणार याकडे सगळ्यांचं लक्ष लागलं आहे.
गणेशोत्सवाच्या आधीच शिवसेनेनं महापालिका प्रशासनाला शिवसेना दसरा मेळाव्यासंदर्भात दोन पत्र दिली आहेत. गणेशोत्सव पार पडल्यानंतर शिवसेनेच्या अर्जावर निर्णय घेतला जाईल, असं मुंबई महापालिका प्रशासनाकडून सांगण्यात आलं होतं. मात्र, अद्यापही त्यावर निर्णय झालेला नाही.
त्यानंतर आता शिवसेनेच्या भारतीय कामगार सेनेनं एमएमआरडीएचे सहमहानगर आयुक्तांना पत्र दिलं असून, त्यात बीकेसी येथील मैदानाचा उल्लेख करण्यात आला आहे.
शिवसेनेचा दसरा मेळावा बीकेसी येथील एमएमआरडीए मैदानावर होणार?
भारतीय कामगार सेनेनं सहमहानगर आयुक्तांना दिलेल्या पत्रात म्हटलं आहे की, ५ ऑक्टोबर २०२२ रोजी सायंकाळी ५ ते रात्री १० वाजेपर्यंत विजया दशमीच्या मुहूर्तावर दसरा मेळाव्याचे आयोजन भारतीय कामगार सेनेच्या वतीने एमएमआरडीए मैदान जी ब्लॉक, जी-२ ते ६ येथे होणार आहे. सदर मेळाव्याला शिवसेनेचे पक्षप्रमुख उद्धव ठाकरे आणि शिवसेना नेत्यांची भाषणं होणार आहे”, असं या पत्रात म्हटलं आहे.
त्याचबरोबर “सदरील मैदान ४ ऑक्टोबर २०२२ ते ५ ऑक्टोबर २०२२ या कालावधीसाठी आरक्षित करावे, ही विनंती”, असं भारतीय कामगार सेनेनं म्हटलं आहे. यासाठी भारतीय कामगार सेनेनं ५,९०० रुपयेही भरण्यात आले आहेत.
शिंदे गट दसरा मेळावा घेणार?
13 सप्टेंबर रोजी संध्याकाळी शिंदे गटाचे आमदार, खासदार आणि पदाधिकाऱ्यांची बैठक झाली. या बैठकीमध्ये शिंदे गटातील अनेक मुद्द्यांवर चर्चा झाली. याच बैठकीत एकनाथ शिंदे यांच्या 20 ते 30 सप्टेंबर दरम्यान होणाऱ्या १० दिवसांच्या महाराष्ट्र दौऱ्याबद्दलही चर्चा झाली. तसेच येणारा दसरा मेळावा, हा देखील शिंदेंच्या बैठकीतला महत्त्वाचा मुद्दा होता.
एकनाथ शिंदेंच्या शिवसेना कार्यकर्ता मेळाव्यात ही स्क्रिन लावण्यात आली होती. त्यावर बाळासाहेब ठाकरे, आनंद दिघे आणि एकनाथ शिंदे यांचा फोटो होता. महत्त्वाचं म्हणजे न्यायालयात जे चिन्ह गोठवण्याची मागणी शिंदे गटाकडून करण्यात आलीये.
ते निवडणूक चिन्ह धनुष्यबाणही या स्क्रिनवर दिसत आहे. त्याचबरोबर ‘गर्व से कहो हम हिंदू है’, असं स्लोगन लिहण्यात आलंय. तर एकनाथ शिंदेंचा या सगळ्यावरुनच शिंदे गट दसरा मेळावा घेण्याच्या तयारीत असून, दसरा मेळाव्याचा विषय हिंदुत्व असेल असं म्हटलं जात आहे.